SURXONDARYO VILOYATI DELEGATSIYASI XITOYDA
Xitoy O‘zbekistonning eng yirik iqtisodiy va investitsiyaviy hamkorlaridan biridir. Sichuan viloyati esa zamonaviy sanoatni rivojlantirish sur’ati bo‘yicha Xitoyda yetakchi o‘rinni egallaydi. Ushbu viloyat bilan to‘g‘ridan-to‘g‘ri aloqalarni yo‘lga qo‘yib, ikki tomonlama savdo-iqtisodiy va sarmoyaviy hamkorlikni yanada kengaytirish maqsadida Surxondaryo viloyati hokimi Bahodir Po‘latov boshchiligidagi delegatsiya Chendu shahriga jo‘nab ketgandi. Safarning birinchi kuni viloyatimiz hokimi Sichuan viloyati gubernatori In Li hamda Chendu shahri meri Lo Syan bilan uchrashdi. Uchrashuv chog‘ida hududlararo savdo-iqtisodiy va sayyohlik sohasidagi  munosabatlarni yanada kengaytirish, ikki tomonlama manfaatli shartnomalar imzolash masalalari kelishib olindi. Bugun esa viloyat delegatsiyasi hamda Sichuan ishbilarmon doiralari vakillari ishtirokida biznes-forum bo‘lib o‘tdi. Ikki tomonlama munosabatlarni yangi mazmun bilan boyitishda muhim ahamiyatga ega bo‘lgan ushbu forumda viloyatimizning iqtisodiy va eksport salohiyati, investitsiyaviy muhit, sarmoya jalb etish bo‘yicha puxta va ishonchli strategiyasi, qulay jo‘g‘rofiy joylashuvi haqida ma’lumotlar berildi. O‘z navbatida xitoylik ishbilarmonlar Surxondaryoda iqtisodiyotning turli tarmoqlarini rivojlantirish bo‘yicha amalga oshirilayotgan sa’y-harakatlar hamda investorlar va tadbirkorlar uchun yaratilgan qulay shart sharoitlar va imtiyozlarni yuqori baholab, o‘zaro manfaatli va istiqbolli loyihalar ishlab chiqish va amalga oshirishga katta qiziqish bildirishdi. Forum yakunida sanoat va qurilish mahsulotlari, energiya tejovchi texnologiyalar, elektronika, tekstil mahsulotlarini ishlab chiqarish, qishloq xo‘jalik mahsulotlarini qayta ishlash yo‘nalishlarida o‘zaro manfaatli hamkorlikni yanada kengaytirish bo‘yicha qator investitsiyaviy shartnomalar imzolandi. Joriy yilning 3 avgustiga qadar davom etadigan safar davomida Sichuan viloyatidagi yirik sanoat korxonalarida bo‘lib, ularning ishlab chiqarish faoliyati bilan yaqindan tanishish hamda ikki tomonlama manfaatli kelishuvlarga erishish ko‘zda tutilgan.
SURXONDARYO VILOYATI DELEGATSIYASI XITOYDA

Muallif:
010719977
01
avg
+2
BO‘SH ISH O‘RINLARI YARMARKASI
Yoshlarning bandligini ta’minlash, ularning  kichik biznes va xususiy tadbirkorlik  bilan shug‘ullanishlari uchun yetarli shart-sharoitlar yaratish maqsadida  Termiz shahridagi Bobur nomli istirohat bog‘ida “Bo‘sh ish o‘rinlari yarmarkasi” o‘tkazildi. “Yoshlar - kelajagimiz” shiori ostida viloyat hokimligi, prokuraturasi,ichki ishlar boshqarmasi, bandlik bosh boshqarmasi, O‘zbekiston yoshlar ittifoqi viloyat kengashi hamda boshqa aloqador tashkilotlar hamkorligida tashkil etilgan mazkur tadbirda Termiz shahri va tumanlarda joylashgan 1900 dan ziyod  korxona va tashkilot o‘zlaridagi  6100 ta bo‘sh ish o‘rinlari bilan qatnashdi.  Viloyatimizning barcha hududlaridan 800 nafardan ortiq yoshlar ishtirok etgan ushbu tadbirda bo‘sh ish o‘rinlari, mehnat qonunchiligi, ijtimoiy muhofaza, tadbirkorlikka yo‘naltirilgan imtiyozli kreditlar to‘g‘risida ma’lumot berildi.  Tadbirda viloyat hokimining birinchi o‘rinbosari T.Bobolov, viloyat prokurori O‘.Saidov ishtirok etdi va nutq so‘zladi.
BO‘SH ISH O‘RINLARI YARMARKASI

Muallif:
010719977
30
iyul
+4
SAYYOR QABUL
Mamlakatimizda amalga oshirilayotgan keng ko‘lamli islohotlar samaradorligini oshirish, odamlarni bugungi kunidan rozi qilishda davlat boshqaruvi idoralarining xalq ichiga kirib borishi, barcha darajadagi mutasaddilarning aholi dardini eshitishi, quvonchu tashvishiga sherik bo‘lishi g‘oyat muhim sanaladi. Shundan kelib chiqqan holda, aholi bilan yaqin muloqotda bo‘lish, uning huquq va qonuniy manfaatlarini himoya qilish, xohish-istaklarini ro‘yobga chiqarish maqsadida bugun Uzun tumanining olis Bobotog‘ hududida joylashgan “Oqmachit” qishlog‘ida sayyor qabul o‘tkazildi. Unda 13 ming 800 nafardan ortiq aholi istiqomat qilayotgan hududdagi “Oqmachit”, “Tolto‘g‘ay”, “Bobotog‘” va “Yangi obod” mahallalari aholisining turli sohalarga oid muammolari, talab va takliflari eshitildi. Fuqarolarning murojaatlari, masalalarini ko‘rib chiqish va hal etish uchun viloyat, tuman hokimliklari mutasaddilari, sektorlar hamda 100 dan ziyod idora va tashkilotlar rahbarlari, Xalq qabulxonasi vakillari jalb etildi. Muloqot jarayonida tadbirkorlikni rivojlantirish, yangi ish o‘rinlarini yaratish, kredit mablag‘lari ajratish, gaz, ichimlik suvi bilan ta’minlash, ichki yo‘llarni ta’mirlash, ta’lim va tibbiyot singari dolzarb masalalarga alohida e’tibor qaratildi.  Fuqarolardan tushgan murojaatlarning aksariyatiga joyida yechim topildi. Muddat talab etadigan murojaatlar bo‘yicha mas’ullar biriktirilib, o‘z vaqtida ijrosini ta’minlash yuzasidan mutasaddi rahbarlar zimmasiga aniq vazifalar qo‘yildi hamda viloyat hokimligi tomonidan nazoratga olindi.
SAYYOR QABUL

Muallif:
010719977
29
iyul
-1
QIZIRIQ TUMANIGA YANGI HOKIM TAYINLANDI
Qiziriqda Xalq deputatlari tuman Kengashining navbatdan tashqari sessiyasi bo‘lib o‘tdi. Unda tashkiliy masala ko‘rildi. Boshqa ishga o‘tganligi munosabati bilan Norqobilov Alisher Mingqobilovich Qiziriq tumani hokimi vazifasidan ozod qilindi. Shu kunga qadar viloyat hokimining qishloq va suv xo‘jaligi masalalari bo‘yicha o‘rinbosari lavozimida ishlab kelgan Muhammadiyev Olim Boboqulovich Qiziriq tumani hokimi etib tasdiqlandi. Sessiyada so‘zga chiqqanlar hududni ijtimoiy-iqtisodiy rivojlantirish, mavjud imkoniyat va resurslardan samarali foydalanish yo‘lida hamjihatlik bilan mehnat qilib, ko‘zlangan marralarga erishish zarurligini alohida ta’kidladilar.
QIZIRIQ TUMANIGA YANGI HOKIM TAYINLANDI

Muallif:
010719977
28
iyul
+3
SURXONDARYO BAXSHI-SHOIR, OQIN VA JIROVLARNI IJODIY BELLASHUVGA CHORLAYDI
Joriy yilning 28-29 iyul kunlari Oltinsoy tumanining so‘lim Vaxshivor qishlog‘ida Surxondaryo viloyati hokimligi hamda O‘zbekiston Respublikasi Madaniyat vazirligi hamkorligida “Baxshi-shoir, oqin va jirovlarning” Respublika festivali bo‘lib o‘tadi. Festivalni o‘tkazishdan maqsad xalqimizning nomoddiy meroslaridan bo‘lgan baxshichilik va dostonchilik san’ati ijrochiligini rivojlantirish, yurtimizning munosib vorislari bo‘lgan yoshlar qalbida milliy qadriyatlarimizga bo‘lgan e’tiborini yanada kuchaytirish, Qoraqalpog‘iston Respublikasi va viloyatlarda faoliyat olib borayotgan baxshi-shoirlar, oqinlar, jirovlar va xalfalarning ijodiy ishlari bilan yaqindan tanishish, shuningdek baxshichilik san’atini keng targ‘ib etishdan iboratdir. Festivalda Shoberdi Boltayev, Abdunazar Poyonov singari 30 dan ortiq surxondaryolik, shuningdek, respublikamizning turli viloyatlaridan taklif etilgan mohir baxshi-shoir, oqin va jirovlar kuylanayotgan asarlarning janr xususiyati, matn va ohang uyg‘unligi, ijro mahorati va sahnada o‘zini tutish madaniyati, so‘z o‘yinlari, maqol va xalq iboralaridan unumli foydalanish, improvizatsiya qobiliyati kabi mezonlar bo‘yicha ijodiy bellashadilar. Bellashuvda turli nominatsiyalar bo‘yicha g‘olib deb topilgan ishtirokchilar hamkor tashkilotlarning diplom va faxriy yorliqlari hamda esdalik sovg‘alari bilan taqdirlanadi. Siz ham ushbu festivalga tashrif buyuring, undan oladigan taassurotlaringiz arzirli va ko‘ngilga xush yoquvchi bo‘lajak!
SURXONDARYO BAXSHI-SHOIR, OQIN VA JIROVLARNI IJODIY BELLASHUVGA CHORLAYDI

Muallif:
010719977
27
iyul
+2
VILOYAT HOKIMI O‘RINBOSARI LAVOZIMIGA YANGI TAYINLOV
Bugun viloyat hokimining qishloq va suv xo‘jaligi masalalari bo‘yicha o‘rinbosari lavozimiga yangi tayinlov amalga oshirildi. Ushbu vazifada ishlab kelayotgan Muhammadiyev Olim Boboqulovich boshqa ishga o‘tganligi munosabati bilan lavozimidan ozod etildi. Shu kunga qadar O‘zbekiston Respublikasi Bosh prokuraturasi huzuridagi Agrosanoat majmui va oziq-ovqat ta’minlanishi ustidan nazorat qilish inspeksiyasida boshqarma boshlig‘i vazifasida ishlab kelayotgan Axunov Ulug‘bek Abdumutalovich viloyat hokimining qishloq va suv xo‘jaligi masalalari bo‘yicha o‘rinbosari etib tayinlandi.
VILOYAT HOKIMI O‘RINBOSARI LAVOZIMIGA YANGI TAYINLOV

Muallif:
010719977
27
iyul
+1
SHEROBOD SEMENT ZAVODI DASTLABKI MAHSULOTINI ISHLAB CHIQARDI
Sherobod tumanining “Vandob” qishloq fuqarolar yig‘ini hududida “Olmaliq kon-metallurgiya kombinati” aksiyadorlik jamiyati tomonidan barpo etilayotgan sement zavodi vohamizda qurilish sanoatini zamon talablari darajasida rivojlantirishda muhim ahamiyat kasb etadi. Kecha ushbu sanoat korxonasida bo‘lib, jadal sur’atlarda amalga oshirilayotgan qurilish ishlari bilan tanishdik. Bosh pudratchi Turkiyaning “Dal Teknik” kompaniyasi vakillari Ali Abatay va Erkan Durak bilan bo‘lgan muloqotda ta’kidlanganidek, loyiha qiymati 212,8 million dollar bo‘lgan ushbu sanoat korxonasida yiliga 1,5 million tonna portlandsement ishlab chiqarish ko‘zda tutilgan. Korxona ishga tushgach, bu yerda mingdan ziyod yangi ish o‘rni yaratiladi. Mahsulotning asosiy qismi ichki talabni qondirishga yo‘naltiriladi. Quvonarlisi, kuni kecha zavod dastlabki mahsulotini ishlab chiqardi. Muloqot chog‘ida “Dal Teknik” kompaniyasi vakillari zavod tomonidan ishlab chiqarilgan ushbu portlandsement namunasini taqdim etishdi. Muloqot yakunida qurilish-montaj ishlarini yanada jadallashtirish, sifati hamda Vatanimiz mustaqilligining 27 yillik bayramiga tuhfa sifatida foydalanishga topshirishga alohida e’tibor qaratish zarurligi qayd etildi.
SHEROBOD SEMENT ZAVODI DASTLABKI MAHSULOTINI ISHLAB CHIQARDI

Muallif:
010719977
26
iyul
+7
KUN TARTIBIDA: XUSUSIY BOG‘CHALAR QURILISHINING BORISHI
Joriy yilda viloyatimizda davlat-xususiy sheriklik asosida 242 ta xususiy maktabgacha ta’lim muassasasini ochish rejalashtirilgan bo‘lib, shu kungacha Termiz shahri va Qumqo‘rg‘on tumanida bittadan shunday xususiy bog‘chalar ish boshladi, qolganlarida esa tashabbuskor tadbirkorlar tomonidan qurilish ishlari olib borilayapti.    Viloyat hokimligida ushbu tashabbuskor tadbirkorlar hamda davlat-xususiy sheriklik asosida ishlash uchun bitimlar tuzish istagida bo‘lgan tadbirkorlik sub’ektlari vakillari ishtirokida o‘tkazilgan uchrashuvda xususiy maktabgacha ta’lim muassasalari qurilishining borishi muhokama etildi. Unda xususiy sheriklar bolalar bog‘chasi barpo etish uchun biriktirilgan bino yoki yer uchastkasi, kredit mablag‘larini ajratish va o‘zlarini o‘ylantirayotgan boshqa qator masalalar yuzasidan viloyat hokimiga to‘g‘ridan to‘g‘ri murojaat qildilar.    Muloqot davomida ko‘tarilgan muammo va takliflarning asosiy qismi shu yerda hal etildi. Yechimi ma’lum vaqt talab etadigan murojaatlar bo‘yicha tegishli tashkilotlar rahbarlariga ko‘rsatmalar berildi, ijrosi nazoratga olindi.  Shuningdek, davlat-xususiy sheriklik asosida ishlash uchun bitimlar tuzish istagida bo‘lgan tadbirkorlarga O‘zbekiston Respublikasi Prezidentning 2018 yil 5 apreldagi “Maktabgacha ta’lim tizimini yanada rag‘batlantirish va rivojlantirish chora-tadbirlari to‘g‘risida”gi qaroriga muvofiq, xususiy bolalar bog‘chalari ochish uchun berilgan imtiyozlar haqida tushunchalar berildi.
KUN TARTIBIDA: XUSUSIY BOG‘CHALAR QURILISHINING BORISHI

Muallif:
010719977
26
iyul
+2
CHEKKA QISHLOQ AHOLISI MUAMMOLARI O‘RGANILDI
Sariosiyo tumanidagi tog‘li Sangardak qishlog‘i viloyat markazidan 200 kilometr uzoqlikda joylashgan. Viloyatimiz hokimi Bahodir Po‘latov ushbu chekka qishloq aholisining turmush sharoitini yaxshilash borasida olib borilayotgan ishlar bilan yaqindan tanishish, mavjud muammolarni o‘rganish maqsadida bu yerga tashrif buyurdi. Qishloq aholisi bilan bo‘lgan muloqot chog‘ida ularni o‘ylantirayotgan muammolar tinglanib, mavjud kamchiliklarni bartaraf etish, muammolarni ijobiy hal etish yuzasidan mutasaddilarga tegishli ko‘rsatmalar berildi. Fuqarolarning murojaatiga ko‘ra, qishloqdagi ta’mirtalab jome masjidi holati bilan tanishildi, aholi uchun qulaylik yaratish maqsadida yangi masjid binosini qurish  bilan bog‘liq vazifalar belgilab olindi. Ma’lumki, ushbu qishloqda joylashgan,  yilning to‘rt faslida ham o‘ziga xos fusunkor qiyofaga ega Sangardak sharsharasi bugungi kunda ekoturizmning muhim yo‘nalishlaridan biriga aylangan. Tashrif davomida viloyatimiz hokimi ushbu maskanda ham bo‘lib, bu yerda mahalliy aholi va xorijiy sayyohlar ko‘ngilli hordiq chiqarishi uchun yaratilgan sharoitlar, yo‘lga qo‘yilgan zamonaviy servis xizmatlari bilan tanishdi.  Hudud qiyofasini yanada yaxshilash yuzasidan topshiriqlar berildi.
CHEKKA QISHLOQ AHOLISI MUAMMOLARI O‘RGANILDI

Muallif:
010719977
26
iyul
+1
XALQ BILAN MULOQOT: MUAMMO, YECHIM VA SAMARA
Hududlarda ijtimoiy-iqtisodiy islohotlarning borishini o‘rganish, aholi turmush tarzi bilan yaqindan tanishish va ularni qiynayotgan muammolarni aniqlash maqsadida Sho‘rchi, Oltinsoy, Sariosiyo va Sherobod tumanlarida faoliyat olib borgan “Jamoatchilik nazorati” guruhlari Qiziriq tumanida ish boshladi. Shu munosabat bilan tumanda o‘tkazilgan sayyor yig‘ilishda viloyatimiz hokimi Bahodir Po‘latov o‘rganish jarayonida aholi tomonidan qo‘yiladigan masalalar, aniqlanadigan muammo va kamchiliklarga alohida e’tibor qaratib, ularni hal etish choralarini ko‘rish yuzasidan “Jamoatchilik nazorati” guruhlari a’zolari, sektorlar rahbarlari hamda viloyat, tuman korxona va tashkilotlari mutasaddilariga tegishli ko‘rsatmalar berdi. - Ishlash prinsipingizni oddiy odamlarning talab va istaklari asosida tashkil etsangizgina, odamlar hayotidan, davlat va jamiyatdan rozi bo‘ladi. Oldimizga qo‘ygan ulug‘vor maqsadlarimizga xalqning dardu tashvishlari bilan yashash, uning manfaatlarini ta’minlash orqaligina erishishimiz mumkin, - dedi viloyatimiz hokimi yig‘ilishda. Shu tariqa, viloyatdagi jamoat tashkilotlari va ommaviy axborot vositalari vakillaridan iborat 4 ta “Jamoatchilik nazorati” guruhi 10 kun davomida tumanning 49 ta mahallasidagi har bir xonadonga birma-bir kirib, aholining muammolari, taklif va shikoyatlarini tinglashga, ijtimoiy soha ob’ektlarida bo‘lib, ularning haqiqiy ahvolini har tomonlama va chuqur o‘rganishga kirishdilar. Sektor rahbarlari hamda tegishli idoralar o‘rganish jarayonida aholi tomonidan ko‘tarilgan masalalar, aniqlangan muammo va kamchiliklarning tezkor va samarali yechimini topish choralarini ko‘rib boradi. Bu esa odamlarning ertangi kunga ishonchini yanada mustahkamlab, hayotdan rozi bo‘lib yashashiga xizmat qilishi bilan ahamiyatlidir.
XALQ BILAN MULOQOT: MUAMMO, YECHIM VA SAMARA

Muallif:
010719977
26
iyul
+4
Sangardak sharsharasi haqida eshitganmisiz?
Bir vaqtning o‘zida yilning to‘rt faslini kuzatish mumkin bo‘lgan joy haqida eshitganmisiz? Zarrin quyosh nurlari ostida jimjimador yomg‘ir yog‘ishini-chi? Qattiq shamol aralash naqd jala quyib turgan paytda bobo quyosh samoda jilmayib turishini-chi?!  Bunday noyob mo‘jizani bir vaqtning o‘zida kuzatish mumkin bo‘lgan joy uzoqlarda emas, yurtimizda. Bu rang-barang nabotot va turfa hayvonot olami, minglab bulog‘u chashmalari bilan nom qozongan Surxondaryo viloyatidagi Sangardak darasi va sharsharasidir.  Sharsharadan o‘ynoqlab tushayotgan suv jozibasiga qishin-yozin ko‘rk bag‘ishlab turuvchi sumbula o‘tlari hech kimni befarq qoldirmaydi. Tabiatning bu go‘zal tuhfasi qish faslida ham sharsharaga o‘zgacha xusn bag‘ishlab turadi. Suvi muzlab, billur shodalari singari bahaybat sumalak hosil qiladigan sharshara bag‘ridagi sumbula o‘tlari shunchaki o‘smaydi. Mahalliy aholining aytishicha, qadimda go‘zallikda tenggi yo‘q bir hurliqo sevgisiga erisholmagach, tog‘ sharsharasi “unguri”, ya’ni bag‘riga kirib g‘oyib bo‘lgan. Uning mayda o‘rilgan sochlari o‘rnidan sumbula o‘sib chiqadi. Hozirgacha bu sumbula o‘tlar sharshara bag‘rida devor bo‘lib o‘sib turganiga guvoh bo‘lish mumkin. Uning bargidagi marjon tomchilar o‘sha suluv qizning ko‘z yoshlari emish.  Dengiz sathidan 2000 metr balandlikdan otilib tushuvchi sharshara tabiatning fusunkor mo‘jizasidir. Atrofdagi qoyalarga urilib yuksaklikdan oqadigan sharshara ko‘zni quvontiradi. Misli kamalakdek tovlanib, sachrayotgan zilol suv bahri dilingizni ochib, xush kayfiyat bag‘ishlaydi. Uning suvi sovuq bo‘lsa-da, salomatlikka ziyon qilmaydi, aksincha, vujudni tetiklashtiradi.  Sharsharaning tovushi asabni tinchlantirib, yurakka quvvat beradi.                                                                                                                                Jonibek Qo‘zimurodov (surat), O‘zA
Sangardak sharsharasi haqida eshitganmisiz?

Muallif:
010719977
24
iyul
+4

 *
© Surxondaryo viloyati hokimligi rasmiy sayti
www.uz
Sayt muallifi: "Axborot-kommunikatsiya texnologiyalarini rivojlantirish markazi" DUK